Binilin ni Presidente Ferdinand Marcos Jr. ti Philippine National Police (PNP) a mangipakat iti maximum tolerance iti panangtaming kadagiti demonstrasion a mangbusor iti naisingasing a Pax Silica initiative, kalpasan dagiti report ti mapapati a pananggipit ken nalabes a panangusar iti puersa kadagiti agprotprotesta nga estudiante.
Segun kenni Palace Press Officer Claire Castro, nalawag agsipud pay idi damo ti direktiba ti Presidente a mangrespeto iti karbengan dagiti umili a mangiyebkas iti opinionda babaen ti natalna a demonstrasion.
Kasaruno daytoy ti report maipapan iti pannakatiliw dagiti tallo nga estudiante ti University of Makati bayat ti panangisayangkatda iti protesta iti Bonifacio Global City iti Taguig City.
Adda met dagiti alegasion a ti dadduma a pulis ken nangdangran iti maysa nga estudiante ken nangheadlock iti maysa a demonstrador.
Nupay kasta, inallukoy ni Castro iti publiko ken media nga ammuen pay nga umuna ti sibubukel a pasamak sakbay a mangited iti konklusion maipapan iti mapapati a panangabuso dagiti pulis.
Kabayatanna, ti Pax Silica ket maysa nga inisyatiba nga indauluan ti Estados Unidos a mangbangon iti natibtibker ken nataltalged a supply chain para iti artificial intelligence ken advanced technologies.
Karaman kadagiti masakupan iti daytoy dagiti critical minerals, enerhiya, semiconductor manufacturing, data centers ken logistics.
Nakaituding a maibangon ti proyekto idiay Tarlac, ngem babbabalawen daytoy ti sumagmamano a sektor gapu iti panagbuteng a mangiturong daytoy iti ad-adda a nasaknap a panagminas, kinakurang ti danum ken enerhia, ken posible nga epektona kadagiti ancestral lands ken cultural heritage.
