BR LA UNION – Binilin ni President Ferdinand Marcos Jr., ni Transportation Secretary Vince Dizon a mangipatungpal ti reporma iti transport system kasaruno ti nakaam-ames a trahedya idiay SCTEX toll plaza ken NAIA Terminal 1 a nakatayan ti 12 nga indibidwal kabilang iti maysa nga 4-anyos nga ubing a babae.
Impasigurado ti Presidente nga agsungbat dagiti rumbeng nga agsungbat iti trahedya.
Tarigagay ni President Marcos a ti nasao a reporma ket mangsiguro iti kinatalged dagiti commuters ken biyahero.
Partikular nga iparep-repaso ti Presidente iti driver licensing system, tapno masiguro a ti driver ket fit, addaan kabaelan, ken responsable nga indibidwal iti kalsada.
Tarigagay pay ti Ehekutibo a maaddaan ti nationwide audit kadagiti bus operators nu sumur-surot met laeng dagitoy iti safety and maintenance standards.
Binilin pay ti Presidente iti Department of Labor and Employment (DOLE) a parmeken dagiti saan a natalged ken mananggundaway nga aramid iti sektor ti transportasyon, nga agresulta iti pannaka-bannog dagiti driver ken atiddog nga oras tapno magun-od da ti quota ngem maikompromiso met ti kinatalged ti publiko.
Iti maysa a video message, nangidanon ti pannaki-simpatiya ni Presidente Marcos iti pamilya dagiti biktima ti trahedya idiay SCTEX ken NAIA Terminal 1.
Impaganetget ni President Marcos a saan nga angaw iti pannaka-pukaw ti 12 nga inosente a biag gapu iti nakaam-ames a trahedya.
Saan a kayat ti Presidente a maulit pay dagiti nasao a vehicular accident.
