Impasigurado ni Presidente Ferdinand Marcos Jr. nga isu ti mangleppas iti saritaan ti panangpasungbat kadagiti indibidual a nagnumar kadagiti kuarta ti umili manipud kadagiti flood control projects – gapo ta isuna iti nangirugi.
Impaganetget ti presidente nga awan ti maited nga “special treatment” kadagiti indibidual a napaulogan ti arrest warrant ti Office of the Ombudsman.
Idi Biernes, inwaragawag ni Presidente Marcos nga addaanen ti arrest warrant ni sigud a Representative Zaldy Co, 17 a sabsabali pay manipud ti DPWH, ken Sunwest Corporation.
Namnamaen ti publiko nga awan sarday iti ar-aramiden da nga imbestigasion ken panangipila dagiti kaso a naibasar kadagiti ebidensia.
Nagyaman met ti presidente iti publiko gapu iti anusda a mangur-uray iti pagdurdur-asan dagiti kaso, ken ita ket addan ti napataud a resulta.
Innayon na pay a saan a parparbo ken saan nga estoria iti naipaulog nga arrest warrant no di ket maibasar kadagiti ebidensia.#
