BR LA UNION – Inbutaktak ti maysa kadagiti 18 nga indibidual a naawagan iti “maleta boys” a naidiaya kadakuada iti gatad a P20 million agingga P25 million tapno i-recant wenno ibabawi dagiti statement-da a mangiram-raman ti sumagmamano nga opisyal ti gobierno—a pakairamanan da Presidente Ferdinand Marcos Jr. ken sigud a House Speaker Martin Romualdez iti kaso a panagkunniber nga adda pakainaigan dagiti flood control projects.
Inaramid ni George Villanon Jr. iti statement kalpasan a nagpirma ti uppat a kakaduada iti affidavits of recantation. Inaklon dagiti uppat a saan a pudno ti orihinal a joint affidavit-da.
Nupay kasta, saan a nainaganan ni Villanon nu siasino ti nangidiaya kadakuada iti dakkel a gatad ti kuwarta.
Pinaglibakanna met a kayat dagiti dadduma a kakaduada nga ibabawi dagiti affidavit-da, agsipudta agtaltalinaed kunana iti takder da iti kinapudno.
Immunan a pinaglibakan ni Atty. Levito Baligod iti akusasyon dagiti uppat a “maleta boys” a pagkuwar-kuwartaan na dagiti kliyentena tapno agaramid ti joint affidavit.
Maipalagip nga idi Pebrero nga immun-una nga inyam-ammo ni Baligod dagiti 18 a bilang dagiti sigud a marines, a maipagarop a nagserbi a bagmen ni sigud a Rep. Zaldy Co iti panagitulod ti P805 bilyon a kickbacks manipud iti anomalya a flood control projects.
