BR LA UNION – Nakarwaren amin dagiti 10 a nabirngasan ti “Maleta Boys” manipud pagbaludan kalpasan a nakapag-piyansa dagitoy iti kasoda a perjury idiay Las Piñas Regional Trial Court (RTC).
Maipalagip nga inarestar ti Las Piñas City Police idi Biyrenes dagiti 10 a nabirngasan ti “Maleta Boys” kalpasan a napaay da a makapag-piyansa gapu iti uppat a kaso a perjury.
Immun-una a nakarwar wenno nawaya-wayaan dagiti tallo a maleta boys kalpasan a dagus da a nagbayad ti piyansa iti intuding a deadline ti korte bayat a ti maysa ket adda iti probinsya.
Nagyaman met ni Atty. Levito Baligod, ti abogado dagiti “14 maleta boys” kadagiti timmulong iti kliyentena a makabayad ti piyansa.
Nagtaud ti kasoda kadagiti immun-una nga alegasyon kontra iti sumagmamano nga opisyal ti gobyerno nga adda pakainaigan iti maipagarop a korapsiyon iti flood control projects.
Kabayatanna, uppat pay kadagiti “18 a maleta boys” ket immunan a nag-recant wenno imbabawi da dagiti immunan a salaysay da. Karaman kadagiti bimmaliktad ket dagiti indibidual a nangiraman kenni Presidente Ferdinand Marcos Jr., sigud a House Speaker Martin Romualdez, ken dadduma pay nga opisyal ti gobierno iti kickback scheme manipud kadagiti flood control projects.
Immunan nga imbutaktak ni Atty. Baligod ti maipagarop a gandat a mangpasuksok kadagiti sigud a bodyguards, a nag-recant iti statement-da. Manamnama nga ibutaktakda ti kinasiasino dagiti adda iti likudan ti mapapati a gandat a panagpasuksok.
Dagiti 8 maleta boys ket sigud a bodyguard ni dati a Congressman Zaldy Co a maipagarop a nangitulod iti maleta a kuwarta kadagiti nangato nga opisyal ti gobyerno.
Malaksid iti perjury idiay Las Piñas City, sumangsango pay ti grupo iti innem a bilang ti cyber libel iti dadduma pay a korte.
