Ibilbilang ni Defense Secretary Gilbert Teodoro Junior nga ‘extortion’ ken ‘blackmail’ iti addang ti China kontra kadagiti Pilipino a mangmangged idiay Hong Kong ken Macau.
Kagiddan dagitoy iti kallabes nga operasyon ti China kontra kadagiti Pilipino a mapapati nga ilegal nga agnanaed wenno agtrabtrabaho sadiay, kas sungbat kadagiti addang iti Pilipinas kontra kadagiti sumagmamano a Chinese nationals a karaman iti pudno nga ilegal nga opeasyon.
Maipalagip a naarestar ti aganay 60 Chinese nationals iti maysa nga ilegal ken hazardous steel plant idiay Misamis Oriental a naraut idi laeng bulan ti Mayo agdama a tawen.
Kinondenar ni Teodoro ti gandat a pannakibiang ti China iti panangipatungpal ti linteg ditoy Pilipinas ken innayon a ti pannakaarestar kadagiti Chinese nationals ket naibasar iti bileg ti search warrant nga impaulog ti korte kas maiyannurot iti legal a proseso.
