Itandudo ni Presidente Ferdinand R. Marcos Junior iti interes pang-ekonomiya ti Pilipinas ken papigsaen iti relasion kadagiti pagilian a miembro ti Asia-Pacific Economic Cooperation (APEC) iti 32nd APEC Economic Leaders’ Meeting a maisayangkat idiay South Korea manipud Oktubre 30 aginggana Nobyembre 2, segun ti Department of Foreign Affairs (DFA).
Ti pre-departure briefing idiay Malacañang, kenuna ni DFA Spokesperson Angelica Escalona nga agturong ni Presidente Marcos idiay Busan ken Gyeongju iti imbitasyon ni South Korean President Lee Jae Myung.
Manamnama nga agbunga dagiti dua a sesyon ti APEC Economic Leaders’ Meeting ti uppat a dokumento, pakairaman ti leaders’ declaration ken tallo nga statement maipanggep ti artificial intelligence (AI), panagbalbaliw ti demograpiya, cultural industry ken creative arts.
Makipaset met ni Presidente Marcos iti Leaders’ Dialogue with the APEC Business Advisory Council (ABAC) ken agbetla iti APEC CEO Summit – a nagtitiponan dagiti nangibagi ken kangrunaan a negosyante tapno talantalen dagiti napapateg nga isyu pang-ekonomiya iti rehiyon.
Makitaripnong pay iti Presidente kadagiti negosyante ken lider ti industriya, ken makipinnulapol kadagiti miembro ti Filipino community idiay Busan.
Ti maudi a paset iti panagsarungkar ket idauluan na iti wreath-laying ken tree planting ceremony iti United Nations Memorial Cemetery idiay Busan kas panangdayaw kadagiti 7,420 Filipino soldiers a limmaban iti Korean War kas paset ti Philippine Expeditionary Forces to Korea.###
