Pinalagip ni Presidente Ferdinand Marcos Jr. dagiti umili a Pilipino a tuladen iti kinatured, nasionalismo, ken natibker a takder ni Gat Andres Bonifacio kontra iti kinaawan ti hustisia.
Ti nasao a waragawag ket kagiddan ti panagrambak ita nga aldaw ti maika-162 nga anibersario ti panakaiyanak ni nabirngasan nga “Ama ng Rebolusyong Pilipino” ken ti nangbukel ti Kataas-taasang, Kagalang-galangang Katipunan ng mga Anak ng Bayan (KKK).
Maysa ni Andres Bonifacio kadagiti naindaklan a banuar iti pakasaritaan ti pagilian a mangpap-papigsa iti nagkaykaysa a rikna ken nanglukat kadagiti mata tapno labanan iti panangirurumen kadagiti Pilipino.
Pinaregta ni Presidente Marcos iti publiko a salimetmetan iti dayaw ken aramiden iti pagrebbengan nga ayaten ken agserbi iti pagilian, kas iti impamatmat a panagayat ni Bonifacio iti pagilian.
Ti pananglagip kadagiti arapaan ken tarigagay nga imbati ti Sumpremo, agtaltalinaed a napateg iti kinatured ken takder ni Bonifacio iti sango dagiti karit ti kabaruan a panawen.
Maysa met daytoy a palagip iti responsibilidad ti tunggal Pilipino a salimetmetan iti wayawaya a nagrigrigatan a nagun-od iti panawen ti kolonyalismo.
Nupay nasurok sangagasut a tawen iti napalabas, agtultuloy a mangipapay ti inspirasion dagiti prinsipio nga imbati ni Bonifacio ken napigsa a determinasion ti pagilian a salakniban iti independensia dagiti rebolusionario.
Impaganetget na pay iti personal a kabibiag ni Bonifacio a nangbukel iti tarigagay para iti maysa a nakailintegan ken patas a komunidad.
Iti panagleppas ti mensahe, tinarigagayan ti Presidente nga agbalin nga inspirasion dagiti adal ni “Maypagasa” (codename ni Bonifacio iti Katipunan) iti tarigagay ti pagilian nga agturong iti maysa a nakappia, nawaya, ken progresibo a Bagong Pilipinas.#
