Paingeten itan ti Philippine Coast Guard (PCG) iti inspeksiyon iti dredging vessels idiay Manila Bay.
Daity ket kalpasan a madiskubre dagiti 13 nga illegal Chinese crew nga awanan dokumento ken sakay iti dredging vessel a Harvest 89 idiay Mariveles, Bataan idi Nobiyembre 26.
Manipud iti naisayangkat nga inspeksiyon, nadiskubre pay ti maysa nga uniporme a kapada ti People’s Liberation Army (PLA) a nangigubuay ti panagbuteng nu anya ngata ti intensiyon dagitoy nga Chinese national.
Mainaig iti daitoy ket kinuna ni PCG spokesperson for the West Philippine Sea Jay Tarriela idi Sabado a binilinen ni PCG Commandant Admiral Ronnie Gil Gavan amin nga Coastguard stations a masakopan ti Manila Bay a paingeten ti panag-inspect kadagiti dredger vessel tapno masiguro nga awan ti Chinese national a sakay dagitoy.
Makikoordinar met ti PCG iti Maritime Industry Authority (MARINA) ken Bureau of Immigration tapno pagsungbaten dagiti agtagikua ken shipping agency kasta met nga agaramid kadagiti legal nga aksyon kontra kadagiti illegal aliens.
