Nagpanawagan iti tulong ti Philippine Coast Guard idiay Kongreso tapno papigsaen ti depensa ti Pilipinas idiay West Philippine Sea.
Partikular a kiniddaw ti hanay ket ti pannakanayon ti pondo da para ti Fiscal Year 2026.
Segun kenni Philippine Coast Guard (PCG) Spokesperson Commodore Jay Tarriela, makikokoordinaren iti agdama ni PCG Commandant Admiral Ronnie Gavan idiay Senado ken Kamara.
Innayon na a kasapulan dagiti kanayunan nga asset kas iti 97-meter Multi-Role Response Vessels (MRRV) a katupag ti BRP Teresa Magbanua (MRRV-9701) nu kasta ket lalo pay a masalakniban ti soberanya ti Pilipinas idiay West Philippine Sea.
Kinuna ni Tarriela a panggep daitoy nga addang a masiguro ti kinatalged dagiti Pilipino a mangngalap kontra kadagiti panang-harass ti China iti mapagsusupiatan a baybay.
Iti agdama ket dua paylaeng iti dadakkel a Multi-Role Response Vessels ti PCG: dagitoy ket ti BRP Teresa Magbanua ken ti BRP Melchora Aquino a masansan a maus-usar para kadagiti adayo nga operasyon.
