Naispal ti Philippine Coast Guard (PCG) dagiti 17 a mangngalap a nasaripatpatan asideg ti Bajo de Masinloc kalapsan a madadael ti tumtumpaw a puon ti kayo iti propeller ti bangka da.
Inlawlawag ni PCG Spokesperson for the West Philippine Sea Commodore Jay Tarriela a nakaawat ti maysa a signal ti BRP Teresa Magbanua manipud iti FB Cassandra, maysa nga fishing vessel.
Impaganetget ni Tarriela nga “urgent” iti napasamak a rescue operation agsipud ta adda da iti uneg ti expected drop zone ti rocket launching ti China ti nasao a fishing vessel.
Dagos a nangisayangkat ti towing operation iti PCG laksid ti napipigsa nga angin ken nagkakangato nga alon, a dumanon ti agingga innem a kadapan.
Aldaw ti Biernes idi nadanon ti BRP Teresa Magbanua ti kabaybayan a sakop ti Mariveles, Bataan ken ditoy a naiyakar ti towing line ti tugboat a TB Lucida.
Segun pay kenni Tarriela, nangisayangkat iti madagdagos nga initial health assessment iti medical team ti BRP Teresa Magbanua kadagiti naispal a mangngalap ken naammoan a maysa kadakuada ket addaan iti hypertensive condition.
