LA UNION – Saan a mabuteng iti Philippine Coast Guard (PCG) iti presensiya ti Monster ship ti China a naka-angkla idiay Escoda shoal.
Iti maysa a presscon ita nga aldaw ti Sabado, impaganetget ni PCG spokesperson for the West Philippine Sea Commodore Jay Tarriela a saan nga agbuteng ti PCG ken saan da a pa-atrasen nga agsubli idiay Palawan iti BRP Teresa Magbanua, maiyannurot iti bilin ni Presidente Marcos Jr. isunga agtalinaed ti presensiya da idiay Escoda shoal.
Immunan nga imbaga ni Comm. Tarriela idi Biyernes a nai-deploy iti CCG 5901 wenno Monster ship idiay Escoda shoal tapno but-butngen iti PCG 9701 wenno BRP Teresa Magbanua.
Mainaig ti daytoy, mangisay-sayangkat ti radio challenges iti PCG 9701 wenno BRP Teresa Magbanua sipud simmangpet iti nasao a shoal iti nadakamat a higante a barko ti China.
Segun kenni Comm. Tarriela mangisay-sayangkat ti PCG ti radio challenge tunggal adda mapagdu-dua-an nga aktibidad ti China kas ti panagdeploy ti rigid-hull inflatable boats.
Ngem maipagarop a saan a direkta a sungsungbatan ti China nu anya iti ranta da iti lugar, imbes ket ibagbaga da a mangisay-sayangkat dagitoy iti maipagarop a lehitimo nga operasyon ti China Coast Guard agsipudta ibagbaga da nga adda soberaniya da iti nasao a paset ti kabaybayan.
