LA UNION – Agtultuloy pay laeng iti imbestigasyon ti pulisya iti napasamak a panagdungpar ti kotse iti sarsarunnuen daytoy a trailer truck a nakatayan iti ahente ti Philippine Drug Enforcement Agency (PDEA) ken ti maysa a pasaherona ti kawatiwatan ti National Highway idiay Barangay Bacuit Norte, ili ti Bauang, La Union itattay alas-12:50 ti parbangon.
Nabigbig ti 39-anyos natay a ni PDEA agent Mark Anthony Xcevea; ken Deogracias Mamaril, agpada a residente ti Aringay, La Union.
Base iti imbestigasyon ti Bauang Police Station, maipagarup a killaat a dimmungpar iti kutit ti sarsarunnuenna a trailer truck a manmanihuen ni Raul Dinangan ti Baguio City ti kotse nga iggem ni Xcevea.
Gapu iti kinapigsa ti pannakaidungpar, nakaro iti pannakakuppit ti kotse.
Kabayatanna, agtultuloy a maag-agasan pay laeng iti ospital ti maysa pay a kaddua ti PDEA agent gapu ti nilak-am daytoy a sugat iti naduma-duma a paset iti bagina.
Agtaltalinaed met idiay kwerpo ti pulisya ti driver ti trailer truck para iti imbestigasyon.
