Nainget a binabalaw ken inyebkas ti Pilipinas ti napasnek a pannakaseknanna iti agtultuloy a panangipatayab ti North Korea kadagiti ballistic missiles.
Iti maysa a statement, kinuna ti Department of Foreign Affairs (DFA) a dagiti kasta nga aramid ket makadangran iti panagdur-as ti ekonomia, urnos, ken kinatalged iti Korean Peninsula karaman iti Indo-Pacific Region.
Impaganetget ti DFA ti panawagan sadiay North Korea a dagus a pasardengen dagiti nadakamat nga aktibidad ken tungpalen ti amin nga internasional nga obligasion agraman dagiti mainaig kadagiti UN Security Council Resolutions ken agkumit iti natalna ken konstruktibo a diyalogo.
Inaramid ti PH ti panawagan babaen ti DFA, kalpasan nga inyuswat ti North Korea ti kaudian a ballistic missile testing iti East Sea idi Lunes.
Dayta ket iti kangitingitan ti political crisis idiay South Korea ken ti panagbisita ni US Secretary of State Antony Blinken idiay Seoul.
Segun iti North Korean state media, ti kaudian a weapon testing ti pagilianda ket baro nga hypersonic intermediate-range missile a nadisenio tapno tamaan dagiti remote targets sadiay Pacifico.
Kasaruno na ket ti panagkari ni North Korean President Kim Jong Un nga ad-adda a palawaenna ti koleksion kadagiti nuclear-capable weapons nu kasta ket makontra dagiti kabusor a pagilian.
