Indeploy ti Philippine Navy dagiit soldado da kadagiti sumagmamano a paset ti Palawan tapno tumulong a mangbakwit kadagiti rinibu a residente a biktima ti panagngato ti lebel ti layus.
Segun iti Navy, nagresponde dagiti personnel manipud 311th Marine Company, Marine Battalion Landing Team-11, ken 3rd Marine Brigade para ti maysa a distress call ti local disaster office ti nasao a probinsya.
Nagturong da iti lugar ken nakita a sumagmamano a barangay iti nalayos, kangrunaanen dagiti coastal areas ti ili ti El Nido.
Agingga ita ket agtaltalinaed latta a nakadeploy dagiti navy personnel kadagiti nagduduma nga ili idiay Palawan kasaruno iti panangibakwit kadagiti pamilya.
Maibasar ti Provincial Disaster Risk Reduction Management – Palawan, dumanonen ti aganay 2,217 a pamilya ti kumpirmado nga apektado ti nasaknap a panaglayus a buklen ti 9,946 nga indibidwal.
Agtaltalinaed met a silulukat dagiti evacuation centers ti nadakamat a probinsya ken temporario a pagnanaedan dagitoy ti 5,856 nga tattao wenno katupag ti 1,440 a pamilya.
Dagiti met dadduma a nalayus ket pinili a temporario a makinaed kadagiti kakabagian ken gagayyem da kabayatan iti panaguray a bumaba iti danum.
Kabayatanna, madama met iti beripikasyon iti maysa nga indibidwal a mapukpukaw kasta met iti naipadamag a maysa nga ubing a nalmes kabayatan iti layus.
