Para iti nasaysayaat ken natalged a pagdalyasatan, indauloan ni Governor Raphaelle Veronica “Rafy” Ortega-David ti inagurasyon ti Pideg Bridge sadiay Tubao, La Union idi Pebrero 5, 2025.
Ti rangtay ket manamnama a manglukat ti ad-adu pay nga oportunidad para iti aktibidad ti ekonomiya para kadagiti umili ti Tubao ken Rosario.
Pinamayat ti aggatad P34.5M a 30 linear meter bridge ti tallo dekadan a sigud nga 10-meter long by 3-meter wide a rangtay.
Napalawa itan ti 6.1 metro a kaakaba ken 30 metro a kaatiddog ti baro a rangtay kasta met a napangato pay ti agingga dua a metro.
Gapo iti daitoy nga upgrade ket kabaelan itan dagiti heavy equipment vehicle ti dumalyasat ti rangtay a mangkonkonektar ti Rosario ken Tubao babaen ti dua a linya.
Impaganetget ni Gov. Rafy babaen ti mensahe na a ti rangtay ket simbolo ti tarigagay a mangkonektar ti probinsya ti La Union nangruna kadagiti taga-Tubao partikular dagiti taga-Barangay Pideg.
Impeksa pay ti Gobernadora ti panagyaman na ti Provincial Engineering Office ket innayon na a saan laeng a dagiti lokal sadiay ti agnumar ti proyekto nu di ket amin nga taga-probinsya.
Innayon na pay a nasken nga ti kalidad ti trabaho ket pang-long term.
Kabayatanna, dimmar-ay met iti inagurasyon ken ribbon-cutting ti La Union Police Provincial Office Provincial Director a ni Police Colonel Heryl Bruno ken ti Provincial Engineering Office staff nga indauloan ni Provincial Engineer Ressie Estrella.
