LA UNION – Napinget iti ar-aramiden ita a panagsanay dagiti pinoy athletes a makibalubal iti Olympics idiay Paris France.
Iti interview ti Bombo Radyo La Union kenni Bombo International News Correspondent Dick Villanueva manipud Paris France, kinuna na nga inspirado iti panagsanay ken magagaran dagiti atleta iti panagrugi ti event, nasurok tallo a lawas pay manipud ita.
Segun kenni Villanueva, naklaat dagiti pinoy athletes a simmangpet idiay Pransiya idi June 22, agsipudta nabara a pinasangbay ida ti filipino community ken embahada ti pilipinas sadiay.
Naisayangkat pay ti misa wenno mass offering idiay St. Bernard Church idiay Metz France idi June 30, para kadagiti atleta kadwa da ti Filipino Community ken Philippine Embassy.
Kinuna ni Villanueva nga, as of July 5, addan idiay Metz France iti 19 a Pinoy athletes ken iti sumaruno a lawas, manamnama a sumangpet ni pole vaulter EJ Obiena manipud Poland, ken dua pay nga atleta tapno makumpleto ti pakabuklan a bilang a 22.
Nakasagana metten kunana ti national stadium ti France nga Stade de France para iti panaglukat ti Olympics Game inton July 26 bayat a mangrugi dagiti sports events inton July 27.
