LA UNION – Awanen ti rumbeng a pagdanagan dagiti kakailian a Pilipino iti napasamak a pammaltog iti maysa a simbaan idiay Sutherland Springs, San Antonio, Texas itay parbangon a nakatayan ti 26 a tattao.
Iti pannakiuman ti Bombo Radyo La Union ken ni Bal Garcia a tubo ti Ilagan City ken agindeg idiay Austin, kinunana a dagus met laeng a natay ti gunman a ni Devin Patrick Kelley, 26, kalpasan a kinamat pay dagiti pulis.
Segun kenkuana, awan ti pakainaigan ni Kelley iti ania man a terrorist organization wenno pangta ti kinaranggas iti nasao nga estado.
Iti baet daytoy ket nagkiddaw ni Garcia iti kararag kadagiti kailian tapno saanen a maulit pay ti gun violence idiay Estados Unidos. (PLAD)
