Dinepensaan ti Philippine National Police (PNP) ti araramiden da nga ‘Oplan Katok’ kontra kadagiti saan nga rehistrado a paltog.
Kinuna ni PNP chief General Rommel Marbil nga ti addang ket maiyannurot ti linteg ken daitoy ket proactive initiative tapno masiguro ti panagbalin nga responsable dagiti gun-owners.
Inulitna pay a saan a maysa a klase ti pangta daytoy kadagiti politiko gapu iti umay nga eleksion nu di ket ti addang ket karaman iti Comprehensive Firearms and Ammunition Regulation Act.
Inlawlawag na pay a suratan nga umuna dagiti police ti maysa nga tao a dapat nga agrenew ti paso nga registration ti paltog wenno i-surrender da laengen daitoy bayat nga saan pay a nairehistro.
Kinunana nga awan ti serbi na ti naipadamag a mausar ti programa bayat ti eleksion.
Naipadamag nga inrekomendar ti Commission on Election a mabalin a kanselaen ti PNP ti programa tapno saan a mausar iti panagpolitika.
