BR LA UNION – Inlawlawag ti Philippine National Police (PNP) nga awan pay ti naawat da nga impormasyon nga adda pangta iti biag ni Vice President Sara Duterte.
Segun kenni PNP chief General Jose Melencio Nartatez Jr, nakabantay da iti sitwasyon kalpasan nga ibaga ti Bise Presidente a mabuteng para iti biag na ken uray iti pamilya na.
Innayon ti PNP chief nga awan ti record da iti sadinuman a cuerpo ti pulisiya a nagreport ti Bise Presidente seknan iti ibagbaga na a pangta ti biag na.
Awan met kunana ti namonitor iti PNP nga anyaman a lehitimo a pammutbuteng a mabalin a mangigubway ti peligro iti biag ti Bise Presidente wenno iti pamilya na.
Nupay kasta, siniguro ni Nartatez a silulukat da nga awaten ti anyaman a report ti panagpangta, a daytoy ket mabalin a babaen ti dokumento wenno waragawag tapno maimbestigaran.
Siniguro pay ti PNP nga ires-respeto da iti karbengan ti siasinuman a mangibaga ti kinatalged da ken panang-trato kadagitoy, ngem napateg nga adda ti umno a beripikasyon para iti umno nga impormasyon.
Kinapudno na, segun iti PNP, adda dagiti pulis a timmulong kenni Duterte idi nangilatang ti piyansa idiay Quezon City Regional Trial Court idi kalman, Sabado gapu iti three counts of grave threats ken natalged met a simmangpet ti Bise Presidente iti korte.
Maipalagip a nagdudua iti Bise Presidente a sumrek idiay QC RTC idinto a nagpa-escort iti pulis gapu iti maipagarop a pangta ti biag na.
Maipalagip a nagramot ti kaso ti bise presidente, iti inaramid na a waragawag iti online press conference idi 2024 nga adda iti binilinna a mangpatay kada Presidente Ferdinand Marcos Jr, First Lady Liza Marcos ken sigud nga Speaker Martin Romualdez ingkaso nga isuna ket mapapatay.
