Inallukoy ti Philippine National Police (PNP) iti publiko nga agtalinaed a nasiput iti kangitingitan ti agtultuloy a panagado ti cryptocurrency ken online investment scams, kalpasan a mailista iti ginasut a kaso idi napalabas a tawen.
Segun kenni PNP chief Gen. Jose Melencio Nartatez Jr., rumbeng nga agannnad dagiti Pilipino kadagiti online platforms a mangikarkari ti saan a kapatpati a tubo.
Maibasar iti datos ti PNP Anti-Cybercrime Group (ACG), dumanon ti 311 investment scam cases iti nailista manipud Enero 1 aginggana Disiembre 31, 2025. Iti daytoy a bilang, 12 a kaso iti konektado ti cryptocurrency schemes.
Agparparang kadagiti report a kadawyan nga al-alilawen dagiti scammer iti biktimada babaen ti kari a nangatngato a kita, ken iti sumagmamano a gundaway ket maipalpalubos pay ti inisial a withdrawal tapno maala ti panagtalek dagitoy.
Aginggana mangalukkoy metten dagiti biktima nga ag-recruit ti sabali sakbay ti naan-anay a pannakablock iti access ti accountda nga agresulta ti dakkel a pannakalugi.
Nagballaag met ni Nartatez a saan laeng a kuarta iti maipan ti peggad, no di ket pati pay iti personal a seguridad dagiti biktima.
Imbalakad ti PNP iti publiko nga i-verify dagiti investment platform, liklikan dagiti diaya nga addaan ti garantisado a nangato a kita, ken saan a mangibinglay ti personal a banking wenno account detail online.###
