Nagpanawagan met ti Philippine National Police (PNP) kadagiti grupo a mangisayangkat iti demonstrasion a respetuenda dagiti naituding a lugar ken proseso ti protesta tapno mataginayon ti urnos ken seguridad bayat a maangangay ti maika-49 nga ASEAN Summit ditoy pagilian.
Segun kenni PNP Chief Police General Jose Melencio Nartatez Jr., bigbigen dagiti pulis ti karbengan ti tunggal Pilipino a mangiyebkas iti kapanunotanda ken mangangay iti natalna a panagtitipon.
Nupay kasta, inallukoyna dagiti organisador a makiuman kadagiti lokal a gobierno ken dagiti otoridad ti pulisya sakbay nga isayangkat dagiti aktibidad.
Binalakadanna pay dagiti demonstrador nga usarenda dagiti naituding a freedom parks ken tungpalenda dagiti probision ti Public Assembly Act of 1985 a mangikedkeddeng kadagiti pagannurotan iti panangisayangkat kadagiti pampubliko a panagtitipon.
Segun iti PNP, agtalinaed a propesional ken kalmado ti pulisya iti pannakilangen kadagiti agprotprotesta bayat ti panangipatungpalda kadagiti kasapulan a security measures. Mainaig iti daytoy, sumagmamano a grupo ti nangisayangkat ken mangisayangkat pay laeng iti tignay-protesta kontra iti isasangpet ni US President Donald Trump ken ti kontrobersial a Pax Silica initiative.
