LA UNION – Ipamaysa ita ti imbestigasyon ti Philippine National Police (PNP) nu siasino ti hitman a kinontak ni Vice President Sara Duterte, a binilinna a mangpapatay kenni Presidente Ferdinand Bongbong Marcos Jr., First Lady Liza Marcos ken House Speaker Martin Romualdez ingkaso nga isuna ti umuna a matay.
Maipalagip a nangiyebbat ti nadagsen a sarita ti bise presidente kabayatan ti virtual media briefing idi Sabado, Nobiyembre 23.
Ngem segun kenni Duterte, saan a direkta a pangta daytoy agsipudta kas iti imbaga na a kalyen na ti bangkay ti pimmusay a sigud a Presidente Ferdinand Marcos Sr. ken ibelleng na idiay West Philippine Sea, saanna a kayat a sawen nga aktual nga aramidenna.
Kabayatanna, inlawlawag ni CIDG Director PBGen Nicholas Torre III a ti direktiba ni PNP Chief Gen. Rommel Francisco Marbil ket imbestigaran ti insidente a saan ketdi a ti bise presidente.
Iti agdama, segun kenni Torre, rugyanen ti CIDG ti motu propio investigation da iti nasao nga insidente.
