Indauluan ni Presidente Ferdinand R. Marcos Jr. ti Change of Command ken Retirement Ceremony ti Philippine Navy, no sadino a binigbig ken nagyaman daytoy iti dua a tawen a panagserbi ni Vice Admiral Jose Ma. Ambrosio Q. Ezpeleta kas Flag Officer in Command.
Kagiddan daytoy, inallukoy ti Presidente iti baro a Navy Chief, a ni Vice Admiral Alan M. Javier, nga ituloy dagiti nairugi nga addang iti modernisasion ken pannakapapigsa ti kabaelan ti Philippine Navy a mangsalaknib iti teritorio ken maritime rights ti pagilian.
Iti sidong ti panangidaulo ni Ezpeleta, pinapigsa ti Navy ti external defense operations ken presensya iti West Philippine Sea, kasta met ti panaggun-od kadagiti moderno nga alikamen, panang-upgrade kadagiti pasilidad, ken panangpalawa iti pannakitinnulong kadagiti dadduma a pagilian.
Impaganetget pay ni Marcos ti kinapateg ti agtultuloy a panagpuonan kadagiti personnels ken alikamen ti Navy tapno ad-adda a masalakniban ti soberanya ti Pagilian.
