Usarenen ti Philippine National Police (PNP) dagiti assets da tapno malapdan dagiti insidente ti kidnapping kadagiti Chinese nationals ditoy pagilian.
Waragawag daitoy ni PNP chief Gen. Rommel Marbil kasaruno ti pannakiuman na kadagiti miembro ti Federation of Filipino-Chinese Chambers of Commerce and Industry Incorporated kalpasan paylaeng ti ti pammapatay ti negosyante a Filipino-Chinese a ni Anson Que.
Kinuna ni General Marbil a maseknan la unay isunan kadagiti insidente ken saan isuna nga agtalna agingga saan a maresolbar dagiti kaso ti kidnappings kadagiti Chinese.
Pinagaraw na metten amin nga investigative assets ti PNP ken madama itan dagiti aksyon tapno saan a mauliten ti nasao nga insidente. Immapela met iti PNP chief a kumalma ti am-amin ken agkaykaysa.
Kinunana ket saan met a mailadawan dagitoy nga isolated incidents iti estado ti Pilipinas nu di ket kolektibo a tarigagay para iti panangpatibker ti rule of law ken panangsalaknib kadagiti amin nga umili nga addaan negosyo ditoy pagilian.
Ti kaso ni Anson Que ket maikatlon nga insidente ti kidnapping kadagiti Chinese nationals ti las-ud ti nasurok laeng maysa a bulan.
Sakbay daitoy ket ti katorse anyos nga estudyante a Chinese a nakidnap iti mismo a pagadalan na idiay Taguig City ken maikadua met ket ti kaso ti maysa a food kiosk owner idiay Maynila.
