BR LA UNION – Nagpanawagan ni Pope Leo XIV kabayatan ti umuna a Sunday Mass na idi kalman idiay St. Peter’s Basilica, ti panagkaykaysa, hustisiya, ken panangisardeng ti panangabuso iti aglawlaw ken kadagiti marigrigat.
Iti panawagan ti Sto Papa ket inaramid na kalpasan ti umuna a misa na kas lider ti Simbaan Katolika.
Sangapulo nga aldaw kalpasan a mabotosan kas umuna nga Amerikano a Santo Papa, indaulwan ni Leo XIV — sigud a Cardinal Robert Francis Prevost manipud Chicago — iti inaugural mass na idiay St. Peter’s Square iti sangwanan dagiti ribu a pilgrims ken kadagiti lider ti naduma-duma a pagilian, kabilang da US Vice President JD Vance ken Ukrainian President Volodymyr Zelensky.
Iti homily na,dinillaw na dagiti parikot a gapwanan ti “gura, kinadamsak, ken sistema pang-ekonomiya a manggun-gundaway iti aglawlaw ken mangisina kadagiti nakurapay .” Nagpanawagan daytoy iti Simbaan a makipaset iti panagbal-baliw iti tengnga ti riribok iti lubong.
Kas maysa a sigud a misyonero idiay Peru, impaganetget ni Pope Leo iti kasapolan a panangawat ti naduma-duma a kultura ken pammati, ken saan nga agpupok iti bukod a grupo.
Iti panagtugaw na kas maika-267 a Santo Papa idi Mayo 8 ket immani iti nabara a panangawat, nangruna idiay Estados Unidos.
Dagiti dadduma ket nangipeksa ti panagdanag.
Kas paset ti tradisyon, immawat ni Pope Leo XIV ti pallium ken Fisherman’s Ring, nga isuot na agingga a sibibiag ngem dadaelen inton pumusay.
Sakbay ti misa ket bimmisita nga immuna iti tanem ni San Pedro — ti umuna a Papa ti Simbaan Katoliko.
Kabayatanna, nairut ti naipatungpal a seguridad iti intero a Vatican iti nasao nga okasyon, a dinar-ayan dagiti lider manipud Europa, Latin America, Israel, ken Canada.
Opisyal a nanglukat ti pontificate ti 69-anyos a ni Pope Leo XIV babaen ti umuna a popemobile tour idiay piazza, tapno kablaawan dagiti tattao ken bendisyunan dagiti sumagmamano nga ubbing.
