BR LA UNION – Opisyal nga inawat ni Pope Leo XIV iti ”Ring of the Fisherman” wenno Piscatory Ring, a simbolo iti otoridad ti Santo Papa kas mangibagi kenni San Pedro.
Ti nasao a seremonya ket naisayangkat kasaruno ti Mass of Inauguration idi kalman, Domingo, Mayo 18, idiay St. Peter’s Square.
Naisuot ti naisang-sangayan a singsing kenni Pope Leo XIV babaen kenni Cardinal Luis Antonio Tagle, Pro-Prefect ti Dicastery for Evangelization.
Iti panangawat ti singsing ket maysa kadagiti kangrunaan a paset iti panagrugi ti maysa a baro a Santo Papa, ken maibilang a historiko gaputa simbolo daytoy ti responsibilidad iti panangidaulo ti Simbaan Katolika.
Iti ”Ring of the Fisherman” ket mangiladladawan kenni San Pedro, sarming ti pagrebbengan na kas umuna a Papa, maibasar iti “New Testament” a Mateo 16:19, Naipaay kenni Pedro ti tulbek ti Pagarian, ken iti Lucas 22:32, Imbilin kenkuana ni Hesus a papigsaen iti pammati dagiti kakabsat na.
Iti Piscatory Ring, a nangrugi idi maika-13 a siglo, ket simbolo ti awtoridad ken responsibilidad ti Sto Papa kas mangibagi kenni San Pedro, iti Apostol a Mangngalap.
Sigud a maus-usar daytoy kas signet ring iti panang-seal dagiti opisyal a dokumento agingga 1842, ngem ita ket maus-usar laengen iti seremonyal a wagas.
Tunggal Santo Papa ket addaan kabukbukodan a singsing. Nu matay iti Papa, iti singsing ket dadaelen tapno saanen a mausar.
Iti singsing ni Pope Leo XIV ket mangipakpakita kenni San Pedro nga addaan kadagiti tulbek ken iket, kas simbolo ti agtultuloy a misyon nga imbati ni Kristo kenni Pedro.
Iti panangawat ti singsing, opisyal nga insuot ni Pope Leo XIV iti pagrebbengan nga espiritual kas maika-266 a kasukat ni San Pedro.
