Ti nakaskasdaaw a galad ni Vice President Sara Duterte ti nangiduron iti House Committee on Good Government and Public Accountability nga iyakar ni OVP chief of staff Atty. Zuleika Lopez iti Correctional Institution for Women idiay Mandaluyong City.
Segun kenni Manila 3rd District Rep. Joel Chua, chairman ti komite, ti desisyon nga iyakar ti kulungan ni Lopez ket nagtulagan iti maysa nga emergency Zoom meeting idi Biyernes kalpasan a nakaawat ti komite ti dua a surat a nangigubuay ti alarma kadagiti miyembro.
Ti umuna a surat ket manipud iti kabsat ti Bise Presidente a ni Davao City Rep. Paolo “Pulong” Duterte, a nagpakdaar iti komite a pinalubosan da ni VP Duterte nga agtalinaed “indefinitely” iti opisina na idiay House of Representatives.
Ti maykadua a surat ket manipud a mismo kenni VP Sara Duterte, a kumidkiddaw ti pammalubos nga ag-jogging iti uneg ti arubayan ti Kamara.
Immuna nga inted ti komite ti surat kenni House Sergeant-at-Arms retired Police Maj. Gen. Napoleon Taas, gapo ta awanan da ti bileg iti daitoy a banag.
Nupay kasta, ti panagwaras ti surat iti social media ket nangigubuay ti anayunan nga alarma kadagiti mamanday-linteg, gapuanan a nangisayangkat da iti emergency session.
Iti Zoom meeting, imbatad dagiti miyembro ti danag da mainaig ti presenya ti Bise Presidente iti uneg ti House complex ken agbalin nga epekto daitoy kadagiti operasyon ti seguridad.
