BR LA UNION – Binabalaw ni President Ferdinand Marcos Jr. dagiti opisyal ti gobyerno ken kakutsabo a kontratista nga agnum-numar ken agtaktakaw ti pondo manipud kadagiti palpak ken “ghost” flood control projects ditoy pagilian.
Impaganetget ti Presidente a dagiti nasao a klase ti aktibidad ket saan laeng a panang-takaw ti kuwarta dagiti tattao, ngem ketdi, panangtakaw pay ti masakbayan dagiti Pilipino.
Imbaga ti Presidente, dagiti karaman iti panagkunniber ti kuwarta ti ili ket agbain da koma iti pamilya a naapektaran iti panaglayos ken kadagiti ubbing a mangtawid manen ti utang gaputi korapsiyon.
Nakagun-od ti standing ovation iti nasao a waragawag ni Presidente Marcos iti State of the Nation Address na idi kalman idiay Batasang Pambansa, seknan iti pumigpigsa a panawagan a sukimaten ti bilyon a pisos a nailatang para iti flood control porjects.
Gaputi dayta, imbilin ni Pres. Marcos iti Department of Public Works and Highways (DPWH) nga agsumite ti listaan iti amin a flood control projects manipud iti napalabas a tallo a tawen.
Maipasidong dagitoy iti panagamiris dagiti regional project monitoring team tapno maamwan dagiti napaay a proyekto, dagiti saan a nalpas, ken maatap a ‘ghost projects.’
Imbaga pay ni Presidente Marcos a maiplastar iti publiko ti nasao a listaan, tapno makipaset dagiti umili iti imbestigasyon.
Siniguro ti Presidente a makaswan amin a mapaneknekan a responsable iti palpak ken nakorap a proyekto ti gobyerno.
