BR LA UNION – Impaganetget ni Presidente Ferdinand Marcos Jr. iti kinapateg ti alyansa iti baetan ti Pilipinas ken Estados Unidos para iti panang-taginayon ti kapya ken kinatalged idiay West Philippine Sea ken iti Indo Pacific region.
Inaramid ti Presidente ti statement kalpasan ti bilateral meeting-na kenni U.S. Secretary of Defense Pete Hegseth idiay Pentagon idi kalman, Lunes, Hulyo 21, 2022.
Impaganetget pay ni Presidente Marcos iti kinapateg ti bilateral discussions kalpasan a nagbaliw iti geopolitical dynamics.
Impeksa ni Presidente Marcos ti napalaus a panagyamanna iti suporta ti gobierno ti U.S. babaen ti joint military exercises ken ti agtultuloy a modernization effort ti Armed Forces of the Philippines (AFP).
Linagip pay ti Presidente iti panagbisita ni Secretary Hegseth ditoy Pilipinas, nga inladawanna kas napateg a simbolo ti PH-US partnership ken panangpasingked manen iti commitment ti dua a pagilian iti Mutual Defence Treaty.
Kadua ti Presidente a bimmisita idiay Pentagon da Defence Secretary Gilberto Teodoro Jr., National Security Adviser Eduardo Año, Presidential Adviser for Investment and Economic Affairs Frederick Go, Philippine Ambassador to the U.S. Jose Manuel Romualdez, ken Defense Undersecretary Salvador Melchor Mison Jr.
Naipaayan pay ti arrival honors ni Presidente Marcos Jr. idi simmangpet idiay Pentagon.
Iti agdama, adda ni Presidente Marcos idiay Washington, D.C. para iti three-day official visit manipud Hulyo 20 agingga Hulyo 22 babaen ti awis ni U.S. President Donald Trump.
Ni Presidente Marcos ti kaunaan a lider iti Southeast Asia a nakipagkita kenni Presidente Trump iti maikadua a terminona.
