Boluntario a simmuko ni Roma Rimando, presidente ti St. Timothy Construction Corporation – a kukua dagiti Discaya – idi rabii ti Lunes idiay Pasig City Police.
Pinasingkedan daytoy ti abogado ni Rimando a ni Atty. Cornelio Samaniego, a personal a nangiyeg kenkuana iti opisina ni Pasig Police Chief PCol. Hendrix Mangaldan.
Insuko met ni Rimando iti pasaportena kas pammaneknek nga awan ti panggepna a tumakas.
Segun kenni Atty. Samaniego, paset daytoy ti nabayagen a legal nga estratehia ken desision ti kliyentena tapno maliklikan a kumaro iti sitwasion.
Awan pay ti naipaulog nga arrest warrant, isu a temporario nga agtaltalinaed ni Rimando iti Pasig Police Station.
Kabayatanna, agtultuloy iti imbestigasion iti maipagarup nga iregularidad kadagiti transaksion ti nadakamat a construction company.#
