Maseknan iti grupo ti mangngalap a Pambansang Lakas ng Kilusang Mamamalakaya ng Pilipinas (Pamalakaya) iti panagbaba ti presyo iti tawilis (Sardinella tawilis) ti P100 kada kilo manipud iti sigud a presyo na a P250, kasaruno ti damag a naibelleng idiay Taal Lake dagiti bangkay dagiti “missing sabungeros”.
Segun iti Pamalakaya, nakaawat da ti damag manipud kadagiti ili ti Cavite a dagiti tawilis ket mailaklako ti kababaan a presyo a P100 iti kada kilo.
Nakipamaysa iti grupo iti panagdanag dagiti mangngalap manipud kadagiti ili a naglikmut ti Taal Lake idiay Batangas a nakaro a naapektaran iti kontrobersyal a kaso.
Kinuna ni Fernando Hicap, presidente ti Pamalakaya, nu agtultuloy a kastoy iti presyo ti tawilis ket sigurado iti panagsuwek ti farm-gate price na para kadagiti apektado a mangngalap.
Nagtultuloy agingga iti agdama ti arig na panag-aryek iti publiko laksid ti panangpasingked iti Bureau of Fisheries and Aquatic Resources (BFAR) a natalged a kanen dagiti ikan a maal-ala idiay Taal Lake.
Kiniddaw ni Hicap iti Department of Agriculture ken BFAR a mangipaay ti tulong kadagiti mangngalap babaen ti direkta a panaggatang kadagiti produkto da ken paregtaen ti publiko a suportaran dagiti mangngalap iti lugar.
Kabayatanna, madama metten ti isaysayangkat dagiti technical divers manipud Philippine Coast Guard a retrieval operations tapno biruken dagiti mapapati a nabati iti bangkay dagiti “missing sabungeros” a napukaw iti las-ud ti Abril 2021 agingga Enero 2022.
