LA UNION – Naartapan ti Police Regional Office (PRO-1) dagiti 17 a Police Regional Offices iti intero a pagilian, nu maipapan iti kaadwan a nasolbar a kaso iti naduma-duma a krimen.
Daytoy iti sipapapanakkel nga imbatad iti Bombo Radyo La Union ni P/Supt. Marlon Paiste, police information officer ti PRO-1, base kunana iti reported crime volume and statistics ti Philippine National Police (PNP).
Kinuna ni Col. Paiste a manipud Enero agingga Mayo ti agdama a tawen, iti PRO-1 iti nakagun-od iti ranked no.1 iti crime clearance efficiency nga addaan ti average rating a 90.30 percent ken ranked no.2 iti crime solution efficiency nga addaan ti average rating a 76.65 percent.
Kaipapanan kunana daytoy a manipud iti pakabuklan nga 11,159 a krimen a napasamak iti Ilocos Region adda iti 10,077 a kaso iti nalaw-lawagan bayat nga 8,553 iti nasulbar a krimen, base pay laeng iti recorded data.
Kinuna pay ti opisyal a ti nagun-od a balligi ket babaen met laengen iti panangikagumaan dagiti police investigators nga imbestigaran dagiti kaso, panang-identify dagiti persons of interest ken suspects, ken pannakitinnulong dagiti biktima ken komunidad.
Kaadwan pay kadagiti nasao a kaso ket adda pakainaigan na iti nairutan a kampanya ti pulisiya kontra droga ken kriminalidad iti rehiyon.
Innayon pay ti opisyal a ti PRO-1 iti addaan kaadwan a napagturpos a drug surrenderees iti sidong ti Community Based Rehabilitation Program.
