LA UNION – Nawayawayaan met laeng iti pulis nga immunan a naipadamag a natiliw ken nakaswan iti grave threat, disobedience to persons in authority, ken naglabsing iti RA 10591 idiay ili iti Aringay, La Union.
Daytoy ket kalpasan a nagpiyansa iti aganay 80,000 pesos para iti inaramid na a violation iti illegal posession of firearms and ammunitions.
Nupay kasta, kinumpirma iti hepe ti pulisya idiay ili nga Aringay a tuloy ti kaso nga administratibo kontra ti nasao nga pulis.
Maipalagip a natiliw daytoy kalpasan nga inreklamo dagiti construction workers nga agtrabtrabaho iti sango iti pagtaengan na, gapu iti maipagarup a panangharass wenno panangbutbuteng na kadakuada.
Ngem depensa ti pulis a naaramid na daytoy gaputi maipagarop a panangbastos dagiti construction workers iti misis na.
Immunan a nabigbig ti suspek a ni P/Cpl Leo Montemayor, 35, addaan asawa ken residente ti Barangay San Benito Norte ti nasao nga ili ken nakadestino iti PNP Aviation Security Group a nakabase idiay Vigan City.
Idi malem ti Domingo, pinaayaban ni P/Capt. Gerardo Macaraeg, OIC iti Aringay Police Station, iti dua a grupo tapno masolbar dagiti concerns da.
Ngem timpuar laeng iti komprontasyon iti baetan iti dua a grupo ket maipagarup pay a nagbalin nga arogante ti pulis iti nasao a cuerpo ti pulisiya ken saan pay a napintas ti pannakitungtong na kadagiti pulis sadiay.
Iti katengngaan iti komprontasyon, nakita ti hepe nga adda imet a cal. 45 pistol iti pulis ken naamwan nga awanan daytoy ti lisensiya.
Iti agdama, naipaayan iti 10 aldaw a pawayway ti pulis tapno sungbatan iti naidatag kenkuana a kaso a grave threat ken disobedience to persons in authority bayat nga ita nga aldaw a maidatag ti administrative case daytoy.
