Nagpanawagan ni Akbayan Party-list Rep. Chel Diokno iti nangatngato a sueldo ken nalawlawa a suporta para kadagiti mannursuro kas panagrambak iti World Teachers’ Day ita nga aldaw.
Segun kenni Diokno, napateg ti akem dagiti mannursuro iti tay-ak ti edukasyon ken panangsukog ti pagilian, ngem adu latta kadakuada iti sumangsango ti problema-pinansyal ken kinakurang iti healthcare.
Narigat kunana a magun-od iti de-kalidad nga edukasyon nu marigrigatan met dagiti mannursuro iti kastos da ti inaldaw-aldaw a pagkasapulan.
Ilunglungalong ni Diokno iti House Bill No. 7649 wenno iti “Dagdag Sahod for Public Basic Education Teachers and Employees Act,” a nairanta para iti kanayunan a P15k basic monthly salary kadagiti mannursuro ken non-teaching personnel iti pampubliko a basic education.
Nakailanad met a maipatungpal daitoy iti las-ud ti tallo a tawen: P6k iti umuna a tawen, P5k iti maikadua, ken P4k iti maikatlo.
Maysa pay nga isingsingasing na ket ti House Bill No. 7648 wenno ti “Healthy Buhay at Hanapbuhay para sa Guro Act,” a mangpalawa met kadagiti ospital, healthcare ken wellness benefits dagiti mannursuro, kasta met dagiti dependents da.
Karaman ditoy iti pannakaidatag iti ‘teachers’ health centers’ ken ‘specialty wards’ kadagiti DOH-retained hospital, uray iti libre nga healthcare services kadagiti pampubliko a pasilidad.
Kadwa ni Diokno iti panangipila kadagitoy a dua a singasing a gakat ket isuda Akbayan Reps. Percival Cendaña, Dadah Kiram Ismula, ken Dinagat Islands Rep. Kaka Bag-ao.
Iti agdama ket agtaltalinaed nga adda sadiay committee level dagitoy a dua a singasing.
