BR LA UNION – Namnamaen nga i-impeach ti House of Representatives ni VP Sara Duterte iti uneg ti dua a lawas, segun kenni Bicol Saro party-list Rep. Terry Ridon.
Kinuna ni Ridon a kumpiyansa iti House Committee on Justice a makagun-od iti minimum a 106 botos kalpasan nga ideklara nga adda probable cause dagiti kaso kontra iti bise presidente, iti tallo a clarificatory hearings.
Nu maaprubaran iti committee report, maisumite daytoy idiay plenaryo ken pagdedebatian dagiti house members sakbay iti pinal a binnotosan, ket nu maipasa, dagus a mai-transmit idiay Senado para iti impeachment trial.
Dinakamat ni Ridon a kabilang kadagiti ebidensya a kitkitaen iti maipagarop a misuse ti confidential funds, P448-M a naisubli a pondo, P6.77B a transaksyon a na-flag ti Anti-Money Laundering Council, ken iti maipagarop a pangta na kontra kenni Presidente Ferdinand Marcos Jr..
Innayon na, saan laeng a 106 botos iti target ngem ketdi posible nga umabot iti 215 tapno maipakita iti napigsa a suporta ti Kamara iti impeachment.
Kabayatanna, imbaga ni Rep. Gerville Luistro a kabilang iti mabalin a mangbukel ti prosecution panel ket isuda Representative Leila de Lima, Representative Chel Diokno, ken dadduma pay a mammanday linteg a sumango iti Senado apaman a mangrugin ti panagusig.
