BR LA UNION – Rinebisar ni Davao City 1st District Rep. Paolo Duterte ti kiddawna a travel authority, ket inaramid na a dua laengen a pagilian, partikular idiay Netherlands ken Australia ti pagturongan na manipud iti orihinal a 17 a pagilian, segun ti Kamara.
Segun kenni Office of the Secretary General Executive Director Jose Marmoi Salonga, immuna a nagkiddaw ni Duterte ti travel clearance manipud Disyembre 15, 2025 agingga Pebrero 20, 2026, ngem kimmiddaw ti Kamara ti kanayunan a detalye ken rebisyon gaputa mairaman daytoy iti session days ti maika-20 a Kongreso a manglukat inton Enero 26, 2026.
Iti naisumite a revise request ti kongresista, kinuna ni Salonga a ti panagbiyahe ni Duterte ket manipud Enero 3 agingga iti Enero 30, 2026, tapno sarungkaran ti amana, a ni sigud a Presidente Rodrigo Duterte, a nakabalud idiay The Hague, ken ti anakna nga agad-adal idiay Australia.
Innayonna a personal a pondo ti maipagarop nga usarenna iti biyahe.
Iti agdama, repaswen ti Kamara ti narebisar a travel request maiyannurot kadagiti pagannurotan ken iskedyul ti sesyon.
