LA UNION – Inwaragawag ni Marikina Rep. Stella Quimbo a mangipila ti ethics complaint kontra kenni Agri party-list Rep. Wilbert Lee.
Kadua ni Quimbo a mangipila ti reklamo ni BHW party-list Rep. Angelica Natasha Co.
Iti maysa nga interbiyu, kinuna ni Rep. Quimbo, leppasenna laeng ti panagipila ti COC sakbay a mangidatag ti ethics complaint.
Ita koma nga aldaw a mangipila ti ethics complaint dagiti dua a babbai a mammanday linteg ngem nakanselar daytoy.
Segun kenni Quimbo, adda impatulod nga “apology letter” ni Rep. Lee, ngem para kenkuana, mapil-pilitan laeng daytoy.
Aminado ti senior vice-chair ti appropriations committee a napa-lemmeng iti likudan ti podium gaputi butengna iti mabalin nga aramiden ni Lee idi rimmaut kadakuada kenni co-budget sponsor BHW party-list Rep. Angelica Natasha Co.
Inlawlawag ni Quimbo ti makagapo no apay a napatugaw iti podium gaputa liniklikanna ingkaso a mangdangran ti mammanday-linteg.
Personal a nagpadispensar ni Lee kenni Co idi nagkitada idiay Tent City a nag-pilaan dagiti senador ken party-list representatives ti COC.
Agingga ita, awan pay ti statement ti kampo ni Lee maipapan iti pasamak ken iti plano nga ethics complaint kontra kenkuana.
