BR LA UNION – Nangrugi idi Sabado, Agosto 9 ti panag-repack iti bagas nga ibunong ti Bombo Radyo Foundation Incorporated iti maysa ribu a pamilya manipud ditoy siyudad ti San Fernando ken idiay ili ti San Juan, La Union babaen iti proyekto nga Oplan Kabalaka: Tulong iti Kabsat.
Nagtitinnulong ti pag-repack iti bagas dagiti volunteers ti simbaan ken sumagmamano nga empleyado ti Bombo Radyo La Union tapno lalo a mapapartak iti panangipaay ti nasao a tulong.
Maipatungpal iti Oplan Kabalaka: Tulong iti Kabsat babaen iti kolaborasyon ti Diocese of San Fernando, La Union.
Iti mensahe ni Most Rev. Daniel O. Presto, D.D., Bishop ti Diocese of San Fernando, napalaos ti panagyaman na iti Bombo Radyo Phils. Foundation iti panangitalek kadakuada ti 100 a kaban ti bagas, a nakatuding a maibunong kadagiti kangrunaan nga agkasapolan.
