BR LA UNION – Nakatuding a maisayangkat ti distribusyon dagiti na-repack a bagas para kadagiti residente a kangrunaan a nadidigra ti bagyo Emong idi Hulyo 15, 2025 ditoy siyudad ti San Fernando ken idiay San Juan, La Union.
Daytoy ket babaen iti proyekto ti Bombo Radyo Philippines nga Oplan Kabalaka: Tulong iti Kabsat.
Idaulwan ti Bombo Radyo La Union ken dagiti kameng ken volunteers ti Diocese of San Fernando, La Union ti panangibunong iti bagas inton bigat, Agosto 14, 2025.
Aganay 500 a pakete ti bagas, 5 kilo tunggal supot, ti maibunong kadagiti benipisyaryo ditoy siyudad ti San Fernando.
Maisayangkat daytoy iti Ilocanos Sur covered court, mangrugi iti alas 7:30 ti bigat.
Aganay 500 met laeng a pakete ti bagas, 3 kilo tunggal supot, ti maibunong kadagiti benipisyaryo idiay San Juan, La Union.
Maisayangkat ti distribusyon idiay Barangay Taboc covered court, agarop ala 1:30 ti malem inton bigat, Agosto 14, 2025.
Kabinnulig ti Bombo Radyo La Union iti panagibunong ti bagas idiay ili ti San Juan dagiti kameng ken volunteers ti Saint John The Baptist Parish.
Nangipeksa ti panagyaman ti maysa kadagiti volunteer ti nasao a simbaan, ni Roi Enrique Estalilla, iti tulong nga ipaay ti Bombo Radyo, iti sidong ti programa nga Oplan Kabalaka: Tulong ti Kabsat.
Kaadwan a mabunongan iti bagas ket pamilya dagiti mangngalap manipud naduma-duma a coastal barangay ditoy siyudad ti San Fernando ken San Juan, La Union.
Dagiti 100 a sako ti bagas ket indonar ti Bombo Radyo Phils. Foundation Inc. para kadagiti biktima ti bagyo Emong.
