BR LA UNION – Impaganetget ni Retired International Criminal Court (ICC) Judge Raul Pangalangan a ti pannakaiturong ni sigud a Presidente Rodrigo Duterte iti International Criminal Court sakbay pay a mangrugi ti pannakadengngeg ti kasona ket napateg a paset ti bista wenno panagusig.
Maipalagip a kuwes-kuwestiyonaran ti kampo ti sigud a Presidente iti wagas ti pannakaaresto ken pannakaiturong na idiay The Hague, Netherlands, ket inawagan da pay a maysa a kita ti extrajudicial rendition wenno kidnapping.
Iti maysa a forum nga inorganisar ti University of the Philippines College of Law, inlawlawag ti umuna a Filipino a nagbalin a hues ti ICC a saan nga ipalubos ti international tribunal ti ‘trial in absentia’ wenno panagusig nga awan ti maysa nga akusado.
Kinunana a ti arrest warrant nga inruar ti korte ti kakaisuna a mekanismo tapno masigurado ti presensiya ti sigud a Presidente iti ICC ken adda daytoy kabayatan ti hearing.
Kinapudnona kunana, iti sidong ti International Criminal Law, saan a kitkitaen iti isyu seknan nu kasatnu nga inaresto iti maysa nga indibidwal nga adda sangsangwenna nga arrest warrant ken maidatag iti korte.
Kadagiti dadackel ken nalatak a kaso kunana, saan pay a maamiris iti legalidad seknan iti wagas a panangala ti korte ti hurisdiksyon iti maysa a suspek wenno maysa nga akusado.
Inyarig ti sigud nga ICC judge ti napasamak kenni Adolf Eichmann, iti German-Austrian official manipud Nazi Party a nasentensyaan ti dusa a patay gaputi crimes against humanity, crimes against the Jewish people ken war crimes.
Segun kenni Pangalangan, nalawag a kinidnap ni Eichmann manipud Latin America, naiturong idiay Israel, nausig ken nasentensyaan.
Impaganetget na, nga adda laketdi hurisdiksyon ti korte iti maysa a suspek, ituloy na ti panagdengngeg ken panangipaay ti desisyon.
Nagserbi ni Pangilinan kas Presidente ti Trial Division ti ICC manipud 2019 agingga 2021 sakbay a naan-anay a nagretiro.
Nangrugi ti panagserbi na kas judge ti ICC idi March 11, 2012.
NATIONAL_____ROBREDO – DE LIMA
headline: Ex-VP Robredo, saanna a naliklikan nga ikumpara ti sitwasyon da De Lima ken Duterte kasaruno dagiti reklamo nga awan ti due process ti pannaka-arestar ti sigud a presidente
Saan a nalapdan ni sigud a Vice President Leni Robredo a mangidilig iti nagbalin a kasasaad ni sigud a Senador Leila de Lima iti agdama a kasasaad ni former President Rodrigo Duterte iti detention facility ti International Criminal Court (ICC).
Iti maysa a press conference iti siyudad ti Naga, kinuna ti sigud a Bise Presidente a saan a kwinestiyunaran ti dati a Senador ti due process ken sinangona ti amin uray nu biddut dagiti akusasyon kontra kenni De Lima.
Kinuna pay ni Robredo a maibasar kadagiti report, nasayaat ti pannakaaywan ti sigud a Presidente ken addaan ti access iti computer, banag a naipaidam kenni De Lima idi daytoy ti naibalud.
Innayon pay ti sigud a Bise Presidente a mapalubosan met ti panagbisita ti conjugal ken family visits bayat nga adda iti kustodiya ti ICC ti sigud a Presidente, idinto a linagip ni Robredo ti kasasaad ni De Lima nga addaan laeng iti electric fan ken awan ti access iti computer nga uray nakatugaw pay laeng idi a senador idi tiyempo a naaresto ken insur-suratna laeng dagiti official document bayat ti kaaddana iti pagbaludan bayat ti panangipatungpal iti trabahona kas senador.
Dinakamat pay ni Robredo ti napasamak a hostage taking kenni De Lima iti uneg ti detention facility idi ginandat ti maysa a balud ti aglibas, a nangikabil iti peggad ti biag ti sigud a senador.
Inaramid ti sigud a Bise Presidente ti statement iti baet dagiti reklamo manipud iti kampo ti sigud a Presidente nga awan ti due process iti pannakaaresto na.
Maipalagip a dandani 7 a tawen a naibalud ni De Lima idiay Camp Crame gapu iti maipagarup a pannakairamanna iti illegal drug trade ngem naibasura idi agangay, idinto a naaresto ni sigud a Presidente Rodrigo Duterte idi Martes, Marso 11 babaen ti bileg ti ICC arrest warrant gapu iti maipagarup a crimes against humanity gapu kadagiti pammapatay iti war on drugs idi panawen ti administrasyonna.
Ti sigud a presidente ket agdama a nakabalud iti detention facility idiay Scheveningen, The Hague, Netherlands a pakasarakan ti headquarter ti ICC, bayat a maur-uray ti pre-trial hearing inton Setyembre 23, 2025.
