LA UNION – Dumanon iti pito pulo a ribo a Pilipino ti nakipaset iti ‘Run for the West Philippine Sea’ idi kalman, Hulio 7.
Daytoy ket maysa nga advocacy run tapno maipangato ti moral dagiti uniformed personnel ti Armed Forces of the Philippines (AFP) ken Philippine Coast Guard a agtultuloy a mangbanbantay ti West Phil Sea.
Pinagyamananan ni Philippine Coast Guard (PCG) spokesperson ti WPS Commodore Jay Tarriela iti adu a bilang dagiti Pilipino a nakipaset iti marathon.
Ti nangato a bilang, kinunana, ket pakakitaan iti suporta dagiti ordinario nga umili iti panangitandudo ti gobierno a mangsalaknib iti WPS.
Naangay ti umuna a paset ti marathon sadiay Pasay City idi kalman idinto a naituding ti maikadua a paset inton Agosto 4 ken maangay daytoi idiay Cebu City.
Agserbi met a host ti Cagayan De Oro iti maikatlo a ‘Run for the West Philippine Sea’ a nakatuding inton Setiembre 8, 2024.
Segun kenni Tarriela, kangrunaan a panggep ti aktibidad ket tapno maipakaammo ti publiko maipapan iti takder ti pagilian iti WPS.
Kinunana a saan laeng a dagiti umili iti mangipakpakita ti suporta no di pay ket iti kagimungan a positibo a senyales para iti mas nalawlawa a suporta para ti WPS.
