Nangipila ni Leyte Representative Ferdinand Martin Romualdez ti House Bill No. 7663 a panggep a mangipaay ti ₱3,000 monthly pension ken social protection package para kadagiti kualipikado a nataengan, addaan ti disability, ken nakurapay a mannalon a saan a karaman ti SSS, GSIS, wenno pribado a retirement system.
Segun kenni Romualdez, napateg ti kaadda ti pension tapno maipaayan ti seguridad iti pinansial dagiti mannalon a masansan a nababa ken saan a sigurado iti matgedanda, ken mapilitan nga agtrabaho iti nasursurok nga edad ti panagretiro.
Makatulong ti regular a pension tapno maksayan ti panagdependir iti pamilia ken maliklikan iti panangilako ti sanikua para iti inaldaw a gastos.
Ti singasing a “Comprehensive Farmers’ Pension and Social Protection Act,” ket insurat met ni Tingog Party-list Rep. Jude Acidre.
Babaen ti singasing, kualipikado a benepisiaryo dagiti sumaganad: Dagiti mannalon nga agtawen ti 60 agpangato nga awanan ti maaw-awat a pension; mannalon nga addaan ti medical certificate ti disability; ken dagiti indigent farmers a binigbig dagiti bukodda nga LGUs maibasar iti Community-Based Monitoring System Act.
Nakalanad pay iti singasing ti pannakaipaay ti ₱50,000 basic life insurance ken agingga iti ₱25,000 accident ken disability assistance tunggal claim.
Ti Department of Agriculture, kadua ti Department of Social Welfare and Development ken ti Philippine Crop Insurance Corp., iti mangimaton iti pannakaipatungpal ti nasao a programa. Ti pondo ket mairaman iti tinawen a badyet ti DA ken DSWD.###
