BR LA UNION – Inawagan ni sigud a presidential spokesperson Harry Roque a maysa a panangipit kenkuana ti agdama nga administrasyon iti inruar a warrant of arrest kontra kenkuana gaputi kaso a human trafficking.
Karaman a maipapa-aresto ni Cassandra Ong a maipagarop a nangimaton ti Philippine Offshore Gaming Operator (POGO) a Lucky South 99 idiay Porac, Pampanga.
Maibasar iti dokumento a pirmado ni RTC Presiding Judge Rene Reyes, nakitaan da iti naan-anay nga ebidensya ni Roque, Ong ken siyam pay a dadduma a naglabsing iti Anti-Trafficking in Persons Act of 2003.
Segun kenni Roque, iyapela na ti nasao a kaso ken usarenna ti nasao a warrant of arrest iti aplikasyon na nga asylum idiay the Netherlands.
Ni Roque ket maipagarop nga adda idiay the Netherlands tapno kumiddaw ti asylum gaputi maipagarop a panangipa-idam ti gobyerno iti karbenganna.
