BR LA UNION – Kontraen ni sigud a Presidential Spokesperson Atty. Harry Roque ti kiddaw ti Pilipinas para iti maysa nga Interpol Red Notice maikontra kenkuana.
Inawaganna daytoy a panaglabsing kadagiti international regulations ken panangriribuk kenkuana, a resulta ti kunana ti politically motivated a kaso.
Iti maysa a statement, nainget a pinagkedkedan ni Roque ti kiddaw a Red Notice, ken impaganetget na a maysa isuna a bona fide asylum seeker iti sidong ti linteg ti Netherlands ken ti European Union.
Segun kenkuana, addaan ti opisyal a dokumento manipud Dutch Immigration and Naturalization Service a mangpaneknek iti protektado nga status na.
Tinakderan pay ni Atty. Roque a ti kaso a syndicated trafficking kontra kenkuana ket peke ken paset ti inawaganna a panagibales ti administrasyon ni Marcos kadagiti kaalyado ni sigud a Presidente Rodrigo Duterte.
Kinunana a ti reklamo ket maar-aramat a “mangdadael ken mangpaulimek” a kas kenkuana a kritiko ni Presidente Ferdinand Marcos Jr.
Imbaga pay ni Roque a ti kiddaw ti gobierno para iti Interpol Red Notice ket panaglabsing iti legal framework ti Interpol, partikular ti Artikulo 2 iti Interpol Constitution a mangikeddeng kadagiti obligasyon ti organisasyon kadagiti karbengan ti tao, ken ti Artikulo 3 a mangiparit kadagiti “politikal” a kaso.
Innayonna pay, a nagsumiten isuna ti panagkedked iti Commission for the Control of Interpol’s Files, ti ahensiya a naikkan iti annongen a mangrepaso kadagiti kiddaw a Red Notice, ken kiniddawna a saan a maaprubaran ti kiddaw ti gobierno ti Pilipinas.
