Pinasingkedan ti Philippine Embassy idiay Portugal nga awan pay ti naawat da nga impormasion maipanggep iti eksakto a lokasion ni sigud nga Ako Bicol Representative Zaldy Co.
Segun kenni DFA Spokesperson Angelica Escalona, iti pannaka-kanselar ti pasaporte ni Co ket dagos a maipakaammu iti Bureau of Immigration (BI) ken ti Philippine Center on Transnational Crime nga isu iti mangipaay ti impormasion iti International Crime Police Organization (Interpol).
Naipasidong ti alert system iti pasaporte kadagiti amin nga international boarder tapno mamonitor iti panagruar ken panaguneg na iti sabali a pagilian.
Saan pay a masungbatan ti ahensia no pudno nga addaan ti foreign passport iti manmanday-linteg gapu ta saan nga amin a Pilipino a makaal-ala ti foreign citizenship ket maireport iti departamento.
Agtultuloy met iti koordinasion ti Department of Interior and Local Government (DILG) kadagiti otoridad idiay Portugal gapo iti mapagduduaan a Portuguese passport ni Co.
Immunan a naideklara kas ‘fugitive from justice’ ti Sandiganbayan bayat nga iti National Bureau of Investigation (NBI) ket nagkiddaw ti red notice iti Interpol kontra iti sigud a kongresista.#
