Ilunglungalong ni Senador Robin Padilla to madagdagos a pannakaipasa ti Senate Bill No. 617 wenno ti Reserve Officers’ Training Corps (ROTC) Act, kagiddan iti panagrambak ti maika-128 nga ‘Araw ng Kalayaan’ ti Pilipinas.
Segun kenkuana, impakita ti kallabes a magnitude 7.8 a ginggined idiay Mindanao ti pagkasapulan para iti natibtibket a kinasagana dagiti umili tunggal adda didigra.
Tarigagay ti singasing a sukogen dagiti agtutubo nga agbalin a disiplinado, nasyonalista, ken nakasagana a sumango ti aniaman a karit ti pagilian, agramanen dagiti didigra ken saritaan maipanggep ti seguridad.
“Ang trahedyang nangyari sa General Santos at mga karatig-lugar ay nagpapaalala sa atin na ang seguridad ng bansa ay hindi lamang tungkol sa mga banta mula sa labas”
Impaganetget na pay a ti seguridad ti Pilipinas ket saan laeng a maipanggep iti pangta ti ruar, nu ketdi, agraman ti panagsagana kadagiti natural a pasamak a kas ti ginggined.
Babaen ti singasing ket mapapigsa ken mapagbalin nga institusyonal iti ROTC program kadagiti Higher Education Institutions (HEIs) ken Technical-Vocational Institutions (TVIs) ti intero a pagilian.
Karaman ditoyen ti panangiyam-ammo kadagiti survival skills, disaster response, search-and-rescue operations, ken relief operations para kadagiti humanitarian emergencies.
Inyunay-unay ni Senador Padilla a saan laeng a military training ti ROTC, nu kedti panangsukog iti responsable nga umili a nakasagana a tumulong iti aniaman a kanito ti emerhensiya.
