Maysa nga Election Attorney a ni Attorney Julia Elenita Tabangin-Capuyan ti nangpakdaar iti publiko maipapan kadagiti Comelec checkpoints ken election gun ban.
Segun kenni Attorney Julia Elenita Tabangin-Capuyan, tallo ti maiparit babaen ti gun ban ti komision: Umuna ti panagusar kadagiti paltog iti ruar ti pagnanaedan, uray no lisensiado, masapul a maalaan latta dayta ti sertipiko ti certificate of exemption.
Maikadua, masapul met a maipakaammo iti komision ti kaadda dagiti body guard wenno security details; Ket kamaudiananna, maiparit met ti pannakaibiahe dagiti explosives, ammunitions, wenno dagiti controlled chemicals.
Kinunana a maar-aramid dagiti kastoy nga addang agsipud ta mabalin nga maaramat ti sabali a panggep wenno iti election-related violence.
Iti agdama, siasinoman a manglabsing ket sumango iti dua, election offense ken ti linteg maipapan ti firearms.
Mainaig iti daytoy, impaganetgetna a laglagipen koma dagiti motorista a visual search laeng ti maaramid kadagitoy kabayatan ti inspeksion kadagiti COMELEC checkpoints.
Daitoy ti routinary ken non-intrusive search wenno kayat na a satwen ket kasapulan laeng a lukatan ti silaw ti lugan ken ibaba ti tawa.
Maipalagip a nairugin ti election period idi Enero 12 pakairamanan ti pannakaipatungpal ti COMELEC checkpoints ken gun bans, ken manamnama nga agpatingga daytoy inton Hunio 11 ti agdama a tawen.
