LA UNION – Nairekord manen iti Philippine Institute of Volcanology and Seismology (Phivolcs) ti nakapsot a phreatic wenno steam-driven eruption iti bulkan Taal idi rabii ti Lunes.
Sigun iti report, napasamak ti aktibidad ti bulkan manipud 9:30 ti rabie agingga iti 9:32 p.m., maibasar kadagiti visual, seismic, ken infrasound records ti Taal Volcano Network (TVN).
Kabayatanna, ti average nga emission ti sulphur dioxide (SO2) ket 4,641 a tonelada iti kada aldaw agingga idi Hunio 20, 2024.
Agtalinaed a nangato ti average a SO2 emissions manipud Enero iti 7,967 a tonelada iti kada aldaw.
Segun iti Phivolcs, ti nakapuy a phreatic activity ket paset ti agtultuloy a pannakairuar dagiti napudot a volcanic gases iti Taal Main Crater.
Inpalagip ti ahensia iti publiko nga agtalinaed ti Alert Level 1 iti Taal Volcano, kayatna a sawen nga adda iti naisangsangayan a kasasaad ken saan a maikonsiderar a nalpasen ti pangta ti panagbettakna.
Ti Alert Level 1 ket kayatna a sawen a mabalin nga adda dagiti kellaat a panagbettak babaen ti singaw wenno phreatic, ginggined ti bulkan, bassit a panagtinnag ti dapo, ken napeggad a panagurnong wenno pannakairuar ti volcanic gas kadagiti lugar iti uneg ti Taal Volcano Island (TVI).
