BR LA UNION – Iti petisyon a naipila idiay Korte Suprema (SC) kontra iti 2025 General Appropriations Act (GAA) ket maysa a gandat a panang-destabilize iti gobyerno ken panang-padas nga isubli iti P1.3 billion a budget ti Office of the Vice President (OVP), nga inikkat ti Kongreso gapu iti mapapati a kinakurang ti transparency iti pannakausar ti pondo.
Kinondenar ni Deputy Majority Leader Paolo Ortega ti petisyon nga inpila ni Rep. Isidro Ungab, ni Atty. Vic Rodriguez, ken dagiti kaalyadoda, a makunkuna a paset ti nalawa a plano pang-politika a ti panggepna ket mangisaknap iti kaawan panniguro ken pakapsoten ti administrasyon ni Presidente Ferdinand R. Marcos Jr.
Kabayatanna, impaganetget ni Acting House Committee on Appropriations Chairperson Rep. Stella Luz Quimbo a saanen a nasken a ratipikaran manen ti Kongreso ti nailinteg a report ti bicameral conference committee, gaputa ti probisyon para iti panagbalbaliw ket nairamanen iti ratified bicameral conference committee report.
Inawagan ni Ortega a maysa a miyembro ti Young Guns iti House of Representatives, iti nasao a petisyon idiay Korte Suprema a “calculated political gambit” a nairanta a manglapped iti panagrang-ay ti administrasyon ken mangriribuk iti gobierno.
Inakusaran na pay dagiti nagpetisyon nga ikagkagumaanda a baliktaden ti desisyon nga inaramid ti Kongreso a mangkissay iti badyet ti opisina ni Bise Presidente Sara Duterte iti P1.3 billion.
Impaganetget ni Ortega a daytoy nga addang ket paset ti pattern ti political manipulation a nairanta a mangisaknap iti panagduadua iti kina-lehitimo ti national budget.
Impakdaarna a ti pudno a panggep ti panangipila iti petisyon ket ti panangpakapuy ti administrasyon ni Marcos ken panangisagana ti posisyon para iti konsolidasyon iti turay ni Vice President Sara Duterte.
Inawaganna dagiti nasao a taktika a “divisive and dangerous,” nga impaganetgetna a saan laeng nga agpeggad ti kinatalged ti gobyerno ngem uray pay ti panagtalek ti publiko kadagiti institusyon ti pagilian.
